لا تعليق !!!

مش عارفة أقول ايه ؟؟
عايزة اتكلم و اقول حاجات كتير
بس كل اما امسك كلمة الاقيها ذابت قبل ما تتكتب
سامحوني المرة دي باكتب عامية ....
مش عارفة اكتب فصحة
مش قادرة اكتب فصحة
الصراحة ..
مكسوفة اكتب بالفصحة
حاسة إن اللغة العربية ذاتها بتتهمنا بالتخاذل

مش عارفة أقول ايه لغزة ؟؟
مش عارفة أقول ايه للأرامل و الثكالى ؟

أقولهم اسفين يا غزة ؟!
عيب ...
احنا مدسناش على رجليهم عشان نقولهم اسفين
احنا دوسنا عليهم كلهم
أو شفناهم بيداس عليهم و حولنا القناة ندور على أخبار الأهلي و الزمالك و الكاس

أقولهم قلبي معاكم ؟!
حيعمل لهم ايه قلبي ؟
مش حيعوض القلوب اللي اتفطرت من الحزن

أقولهم ربنا ينصركم ؟
حينصرهم ازاي و المسلمين واقفين يتفرجوا
نشجب و ندين و نندد ...
و نقاطع ؟!
عملناها قبل كده كم مرة ...
لا رجعنا اللي ماتوا و لا أخدنا بتارهم
و لسه الغاز بيروح لعدونا و عدوهم
و لسه بنصافح اللي بيقتلوهم

يا بختهم !!
اللي ماتوا استريحوا من الحصار و التعذيب
اللي ماتوا دخلوا الجنة شهداء
و سابونا احنا عايشين بذل ذنبهم
معيرين بآلامهم

لما منتظر الزيدي رمى جزمته في وش بوش
كلنا فرحنا و هللنا
و طلعنا نكت و ضحكنا
ايه؟
هو احنا بجد معدناش بنعرف نبقى ابطال الا من بعيد لبعيد و لا ايه؟

أقولهم ايه بس ؟
مش عارفة ...
سمعتوا آخر نكتة ....
مرة شعب عربي بالكامل ... مليار و نص بني آدم
اتداسوا بالجزم و اتف عليهم
أنا غلطت ...
في الأول أنا قولت مرة ...

بس هي مش مرة

أقول ايه بس ؟!
مش عارفة ....
أقولكم ...
حاعمل زي الجماعة المثقفين لما يتزنقوا و أقول ...
لا تعليق!!

.

------------------------------------------------------------------

تحديث:

===

.

لقيت التعليق ده على إحدى المدونات بتوقيع غير معرف

بس لخص اللي ممكن يتقال

"أما عن الرد اذا كان هناك من يريد الرد و هو سهل لمن يعيش خارج غزة و هو كاف لاثارة الرعب في قلوب الصهاينة, بدلا من خروج مظاهرات تضر و لا تفيد, أخرجوا جميعا الي الصلوات الخمس في المسجد و أضمن لكم أن يرتعد الصهاينة خوفا, أرأيتم كم هم ضعفاء و أكثرنا أضعف"

.

.

يمكن لما ندعي يستجاب مننا

و لا حتى منتكسفش من ربنا